சமீபத்தில் (ஆகஸ்ட் 9, 2026 – ஞாயிற்றுக்கிழமை) என்னுடைய இரண்டாவது மகளின் ‘முதல் நற்கருணை விழா’வை (First Holy Communion) நல்லபடியாக நடத்தி முடித்தோம். ஒரு விழாவைத் திட்டமிட்டு நடத்தும்போது எவற்றையெல்லாம் சரியாகச் செய்தோம், எவற்றில் தவறுகள் நடந்தன என்பதை வருங்கால நினைவிற்கும் பயன்பாட்டிற்கும் இங்கே பதிவிடுகிறேன்.
விழாத் திட்டமிடலும் தங்குமிடம் / போக்குவரத்து ஏற்பாடுகளும்
இந்த முக்கியமான நிகழ்வு தேவாலயத்தில் காலை 10:30 மணிக்கு ஆரம்பித்து, 12:00 மணிக்கு முடிந்தது. அதன் பிறகு அருகில் உள்ள ஒரு சிறிய திருமண மண்டபத்தில் பரிசு வழங்குதல் மற்றும் மதிய உணவு உபசரிப்பிற்கு ஏற்பாடு செய்திருந்தோம்.
சென்னை மற்றும் வெளியூர்களில் இருக்கும் நெருங்கிய உறவினர்கள், நண்பர்கள் அனைவரையும் அழைத்திருந்தேன்.
- வெளியூர் விருந்தினர்கள்: அவர்களின் வருகை நேரத்தையும் எண்ணிக்கையையும் முன்கூட்டியே சரியாகக் கணித்து, அதற்கேற்ப தங்குமிடமும் உணவும் ஏற்பாடு செய்தோம். சனிக்கிழமை காலை மற்றும் மதிய உணவு வீட்டிலேயே ஏற்பாடானது. சிலரை காலையிலேயே அறைகளுக்கு அனுப்பி வைத்தோம்; சிலரை மாலையில் அனுப்பி வைத்தோம். இரவு உணவிற்கு அறையின் தரைத்தளத்தில் இருந்த உணவகமே வசதியாக அமைந்தது.
- மண்டபத் தேர்வு: நாங்கள் தேர்வு செய்த மண்டபம் தேவாலயத்திற்கு மிக அருகிலேயே இருந்தது. தரைத்தளத்தில் ‘ஏ டு பி’ (A2B) சைவ உணவகம், முதல் மற்றும் இரண்டாம் தளங்களில் தங்கும் அறைகள், மூன்றாவது தளத்தில் விழா மண்டபம் என அனைத்தும் ஒரே கட்டிடத்தில் அமைந்ததால் தனியாகப் போக்குவரத்து ஏற்பாடுகள் எதுவும் செய்ய வேண்டிய அவசியம் ஏற்படவில்லை. விருந்தினர்கள் கோயிலில் இருந்து நடந்தே மண்டபத்திற்கு வந்துவிட்டனர்.
- வாகன வசதி: இருந்தாலும், ரயில் நிலையத்திலிருந்து விருந்தினர்களை அழைத்து வரவும், அவசரத் தேவைகளுக்கும் ‘எர்டிகா’ (Ertiga) காரை இரண்டு நாட்களுக்கு வாடகைக்கு எடுத்து வைத்திருந்தோம். அது மிகவும் பயனுள்ளதாக இருந்தது.
மனநிறைவைத் தந்த நல்விஷயங்கள்
1. மதிய உணவு (ஹாஜியார் பிரியாணி & A2B சைவ உணவு)
“செலவு அதிகமானாலும் பரவாயில்லை, உணவு சிறப்பாக இருக்க வேண்டும்” என்பதில் தெளிவாக இருந்தோம். அதனால் எங்களது பகுதியில் மிகச் சிறப்பாகச் சமைக்கும் ‘ஹாஜியார் பிரியாணி’ அவர்களிடம் பிரதான மதிய உணவை ஆர்டர் செய்திருந்தோம். சைவ உணவு சாப்பிடுபவர்களுக்காக A2B உணவகத்திலும் தனியாக ஏற்பாடு செய்திருந்தோம். வந்தவர்கள் அனைவரும் உணவை மிகவும் பாராட்டிப் பேசினார்கள்.
கற்றுக் கொண்ட பாடம்: ஒரு விழாவில் சிறு சிறு குறைகள் இருந்தாலும், உணவு அருமையாக இருந்தால் வந்தவர்களுக்கு முழு மனநிறைவு கிடைத்துவிடும். அதேவேளையில் மற்ற ஏற்பாடுகள் எவ்வளவு நன்றாக இருந்தாலும் உணவு சரியில்லை என்றால் ஒட்டுமொத்த விழாவின் பெயரும் கெட்டுவிடும்.
2. வித்தியாசமான நன்றிப் பரிசு (Return Gift)
பொதுவாக விழாக்களில் தாம்பூலப் பை, தேங்காய் அல்லது பிளாஸ்டிக் தட்டு தருவார்கள். அதற்குப் பதிலாக, இந்த முறை பூச்செடி கன்றுகளைப் பரிசாகக் கொடுக்க முடிவு செய்தோம். இந்த யோசனையை வந்திருந்த உறவினர்களும் நண்பர்களும் மிகவும் பாராட்டினார்கள்.
விழாச் செலவுகளின் விவரம்
- எதிர்பார்த்த விருந்தினர்கள்: 250 நபர்கள்
- மதிய உணவு (200 நபர்களுக்கு – ஹாஜியார் பிரியாணி): மட்டன் பிரியாணி, சிக்கன் 65, தயிர் பச்சடி, கத்திரிக்காய் கிரேவி, பிரெட் அல்வா, ஐஸ்கிரீம், வெல்கம் டிரிங்க், இலை, வாட்டர் பாட்டில், பேப்பர் ரோல், கார் பேஜ் பேக், பரிமாற 5 நபர்கள் மற்றும் போக்குவரத்து உட்பட — ₹94,600
- சைவ உணவு (20 நபர்களுக்கு – A2B): பரிமாறும் 2 நபர்கள் உட்பட A2B உணவகத்தில் சைவ உணவு ஏற்பாடு — ₹4,500
- நன்றிப் பரிசு (பூச்செடிகள்): 150 செடிகள் (செடி ஒன்று ₹30) — ₹4,500
- மண்டப வாடகை (காலை 6 – மதியம் 2): ₹30,000
- மின்சாரக் கட்டணம் (EB): ₹3,200
- அலங்காரச் செலவுகள் (Decoration): ₹13,500
- இரண்டு நாள் கார் வாடகை (Ertiga): ₹6,600
- தங்கும் அறைகள் கட்டணம் (Hotel Rooms): ₹70,000
- புகைப்படம் மற்றும் வீடியோ (Photographer): ₹23,000
நாங்கள் செய்த தவறுகளும் கற்றுக் கொண்ட பாடங்களும்
- நன்றிப் பரிசு நிர்வாகம்: மண்டப நுழைவாயிலில் ‘வெல்கம் டிரிங்க்’ வைத்திருந்தோம். அது காலியானதும், அதே இடத்தில் பரிசளிக்க வேண்டிய பூச்செடிகளை எடுத்து வைத்திருக்க வேண்டும்; அதை நாங்கள் மறந்துவிட்டோம். பின்புறம் இருந்த செடிகளைச் சில விருந்தினர்களே கவனித்து எடுத்துச் சென்றனர். தாமதமாகவே அதை உணர்ந்து நாங்கள் முன்னால் எடுத்து வைத்தோம்.
- செடிகள் பேக்கிங் முறை: நன்றிப் பரிசாக ஆர்டர் செய்த செடிகளை அனுப்பியவர்கள் ஒவ்வொரு செடியையும் தனித்தனியாகக் கொடுத்துவிட்டனர். அதை ஒவ்வொன்றாக எடுத்து ஆளுக்குக் கொண்டு செல்வதற்குள் சிரமமாகிவிட்டது. செடிகளை ஆர்டர் செய்யும்போதே 20, 20 செடிகளாகப் பைகளில் போட்டுத் தருமாறு முன்கூட்டியே கேட்டிருக்க வேண்டும்.
- உணவுப் பரிமாற்றக் கண்காணிப்பு: மதிய உணவு பரிமாறிய இடத்தில் எங்களது ஆட்கள் யாரும் தொடர்ந்து நின்று கண்காணிக்கவில்லை. மதியம் 2:30 மணிக்கு மேல் வந்தவர்களுக்கு பிரியாணி இல்லை, காலியாகிவிட்டது என்று சொல்லிவிட்டார்கள். ஆனால் கேட்டரிங் ஆட்கள் பின்புற வழியாக பிரியாணியை எடுத்துச் சென்றது தெளிவாகத் தெரிந்தது. குறைந்தபட்சம் 20 நபர்களுக்கான உணவை எங்களது நேரடிப் பார்வையில் முன்னால் எடுத்து வைத்திருந்திருக்க வேண்டும்.
- அழைப்பிதழ் கூரியர் தேர்வு: வெளியூர்களுக்கு அழைப்பிதழ் அனுப்ப ‘Professional Couriers’ பயன்படுத்தினோம். கட்டணமும் அதிகம், அதேசமயம் பல அழைப்பிதழ்களைச் சரியாகச் சேர்க்காமல் திருப்பி அனுப்பிவிட்டனர். இதைத் தவிர்த்திருக்கலாம்.
ஒரு மாதத்திற்கு முன்பே திட்டமிட்டுச் செய்ததால், மேலே குறிப்பிட்ட சில சிறிய தவறுகளைத் தவிர விழா மிகவும் சிறப்பாகவும் மனநிறைவாகவும் நடந்து முடிந்தது!
-பெஸ்கி
